Ուաշինկթըն Կրկին Պաքուին Կոչ Ուղղած Է` Դադրեցնելու Ընդդիմադիրներու Եւ Լրագրողներու
Վրայ Ճնշումները
Ազրպէյճանական «Հաքքին.ազ» կայքէջը կը հաղորդէ, որ Միացեալ Նահանգներ անգամ մը եւս Ազրպէյճանին
կոչ ուղղած են` յարգելու եւ երաշխաւորելու մարդու հիմնարար իրաւունքները եւ ազատութիւնները:
ՄԱԿ-ի մարդկային իրաւանց խորհուրդին մէջ Միացեալ Նահանգներու մնայուն ներկայացուցիչ Էյլին
Տոնահիու երէկ յայտարարած է, որ Ազրպէյճանի մէջ մարդկային իրաւանց վիճակը կը մտահոգէ
Ուաշինկթընը: Ան դատապարտած է Ազրպէյճանի մէջ երիտասարդ գործիչներու եւ լրագրողներու
ձերբակալութիւններու, անոնց նկատմամբ ճնշումներ կիրարկելու, հաւաքներու ազատութիւնը սահմանափակելու
դէպքերը եւ ազրպէյճանական իշխանութիւններուն կոչ ուղղած է` յարգելու մարդու հիմնարար
ազատութիւնները: Տոնահիու նաեւ անդրադարձած է ազրպէյճանցի յայտնի լրագրող, «Ազատութիւն»
ձայնասփիւռի ազրպէյճանական ծառայութեան թղթակից Հատիճա Իսմայիլովայի դէմ սկսած հետապնդումներուն
եւ դատապարտած կին լրագրողը վախցնելու ու ճնշելու փորձերը: ՄԱԿ-ի մարդկային իրաւանց
յանձնախումբին մէջ Միացեալ Նահանգներու ներկայացուցիչը Ազրպէյճանի իշխանութիւնները յորդորած
է ազատ արձակել իրենց կարծիքը արտայայտելու համար ազատազրկուած բոլոր անձերը, դադրեցնել
ընդդիմադիր գործիչներու հետապնդումները եւ երաշխաւորել հաւաքներու ազատութեան իրաւունքը: